MARISONG.RU

1.Тиде ожнырак лийын. Морко милиционер-влак Унчо ялышке миеныт. Кумытын лийыныт.Ужыт, капка ончылно ошмаште изи рвезе машина дене ошмам шупшыкта. Милиционер-влак йодыт: «Ачат уло мо?» Изи рвезе ойла: «Уке».

- Кушко каен?

- Шораш каен.

— Йӧра, вучалтена,— милиционер-влак ойлат. Ик жап эрта, а ачаже уке. Адак йодыт: «Ачаже кушто?» Изи рвезе ойла: «Ача Шораш каен». Милиционер-влак шонат, мо тиде туалетыштыже тынаре шинча. Адак йодыт. Рвезе ойла: «Мыйже ойлышым вее-ет. Аче шораш каен». Нине огыт умыло, мом тыгаре ачаже шонданыште ышта. Изи йоча умбакыже ойла: «Ача Шораште колым куча» Вот окмак-влак, пален огытыл. Шора тиде эҥер улмаш.

1. Бригадирлан Эчук пашам ыштен. Пеш мотор рвезе ыле. Шуко ӱдырамашын чонжым тургыжландарен. А шкеже пошкудо ватым йӧратен шынден. Ик кастене вашлияш кутырен келша. Саде ӱдырамашет ойла:

- Эчук тый кӱтӱ деч вара амбарыш тол, мый тыйым вучаш тӱҥалам.

Но пошкудет гын ватыжлан тидым каласен. Кастене пелашыже вашлиймашыш толеш. Пычкемышыште Эчук кидше дене кап-кыл мучко шыматылеш, а шкеже ойла:

- Еҥын еҥынак. У, уак.

Шкеже шыматыме пашажым шукта да шукта. «Пошкудо ватыжлан» пӧлекым у катам да у халатым ыштен кода. Вара мӧҥгӧ ошкылеш да клатыш малаш возеш. Эрдене ватыже мелнам кӱештеш, шыл шӱрым шолта. У халатым, йолышкыже у катам чиен шогалеш. Мелна салмажым налмыж годым ойла.

- Эчук! Тый кузе, мый туге. Еҥын вет тудо еҥынак.

Пелашыжым ончалеш да ешара:

- У вет тудо у-уак.

Эчукын ушыже каен. Но вараже ватыже Эчукым проститлен. Умбакыже сайынак иленат

2. Кодшо ийлаште марий калыкын ош монча огыл, а шем монча лийын. Ик комака, кугу гына монча покшелне шога. Вӱдлан под уке. Вӱдым кӧршӧк дене ырыктеныт. Тӱньык лийын огыл. Омсам почын шындат. Шикш омса гыч лектеш. Южо еҥже труба гайым оҥа дене ыштен. Но пешыже нимат ок полшо. Шикш чыла пырдыжыш шинчеш, шӱч лиеш. Монча 50–60 метр сурт деч ӧрдыжыште шинчен. Каласыман, тошто калык шонен моштен. Мончашкыже гын чыра тул дене пурен.

Мыйын ик гана пуремым годым томаша лийын каен. Мончаште аҥыргенам. Лекнем, тыҥге-туҥге писын йӧрлын каем да пырдыжым кок кидем дене руалтен кучем. Каласыман, тыге шуко гына калык мончаште аҥырген. Вара мӧҥгӧ тарваненам. Пӧртышке пурен шогалам, а тиддеч ончыч шӱргемым кидем дене ӱштылынам. Изи колой-влак ӱстел тӧрыште чайым йӱын шинчат ыле. Мыйым ужын чорикле кычкыраш, магыраш тӱҥальыч. Изиракше ӱстел йымаке шыльыч. Тунам электротул лийын огыл. Лампе тулын яндажат уке ыле. Пӧртыште пешыжак волгыдо огыл. Мые ачай деч йодам.— Мо тугае? Тудо ойла: — Тый шкендычым воштончышыште ончал, вара палет. Ой, юмыжат! Воштончыш гычын мыйым ала могай шем маска веле онча. Шкежат лӱдын колтышым. Содор мончашке угыч чошышым.

АРАКАВОЛЬЬЫК.

Палымем йӧрата мыскарам,

А лӱмдат тудым — мыскараче.

Ну а тый йӧратет сырам,

Садланак лӱмнерет — «сыраче».

Йолташем йӧрата кином

Да манеш: «Мый улам киноман».

Тый моткоч пагалет вином,

«Виноман» маналтат аман.

Ик марийлан келша гармонь,

Шокталта – эх, могай гармончо!

Тыланет гын — коньяк мойн…

Ынде кӧ лийынат, ончо:

Каныш я пытарет пашам,

Кочо вӱдым тамлет. Тольык

Тый шижынат мо ик томашам? –

Маналтатыс «аракавольык»

1. - Витя, Мланде кушеч лийын, палет?
   — Нигушеч лийын огыл. Тудын йырже вӱд.
   — А вӱдшӧ кушеч лектын?
   — Тидымат от пале? Кызытат мланде кӧргӧ гыч йоген лектеш. От ӱшане гын, памаш коремыш волен ончал.
2. Туныктышо рвезе деч йодеш:
   — Витя, тый Олюкмытын уремыште илет вет?
   — Уке, Олюк шкеже мемнан уремыште ила,— вашешта Витя.